كلمات / مصطفى معوض – رحاب سالم
أصعب حاجه
لما الحلم فى إيدنا يموت
نكتم صرخه من جوانا
بس الصرخه من غير صوت
احنا شباب احلامنا كبيره
بس فى بلدى الحلم يموت
أصل فى بلدى فى خلق بتكبر
وخلق بتاخد بالشلوت
ما حنا كبرنا لقينا الكوسه
وشوفتا الحوسه
وفى ناس زى تراب مكنوسه
وفى ناس عايشه فى الملكوت
عايز شغله ياهنيالك
أيوه فلوسها تكفى عيالك
شخلل جيبك أدفع مالك
أصل ضمير بلدك بيموت
وفى ناس سعيها ديما للخير
توزع لحم كتير على الغير
وأخرها بيطلع لحم حمير
وفقير مصر يادوب كتكوت
واه يابلدى ومليون اه
أتقتل العدل وكله معاه
أما الحق فى المستشفى
ناقص له يومين وخلاص هيموت
كلمات
مصطفى معوض
و
رحاب سالم
